Սիրելի ընթերցող, մի մոռացիր, որ յուրաքանչյուր օրգանիզմ յուրովի կարող է արձագանքել այս կամ այն դեղատոմսին: Ինչը օգտակար է մեկին, կարող է հակացուցված լինել մյուսին: Այդ պատճառով մինչ դեղատոմսերը գործածելը, ճիշտ կլինի խորհրդակցել բժշկի հետ:
Սիզախոտը (պիրեյ) ժողովրդական բժշկության մեջ
Այս բույսի բարձրությունը հասնում է 50-125 սմ-ի: Սիզախոտը ծաղկում է ամռան սկզբից մինչեւ վերջ: Իսկ ընդհանրապես այն աճում է եւ շոգ, եւ ցուրտ պայմաններում: Սիզախոտը կարող է ապրել այն բոլոր պայմաններում, որտեղ մահանում են մյուս բույսերը: Պետք է ասել, որ սիզախոտը համարվում է մոլախոտ, բայց դա չի նշանակում, որ այն չի կարող օգտակար հատկանիշներ ունենալ: Որպես դեղաբույս, այն լայն գործածություն ունի ժողովրդական բժշկության մեջ: Սիզախոտի արմատների թուրմը օգտագործվում է որպես խորխաբեր ու միզամուղ: Այն նաեւ շատ լավ օգնում է սրտային անբավարարության հետեւանքով առաջացած այտուցների, ռեւմատիզմի եւ պոդագրայի դեպքում: Թարմ տերեւներից պատրաստված հյութը դրական ազդեցություն կարող է ունենալ բրոնխիտի, օստեոխոնդրոզի եւ ֆուրունկուլյոզի ժամանակ: Սիզախոտի ջրաթուրմով լոգանքը շատ լավ է թութքին, ռախիտին եւ դիաթեզին: Սիզախոտը շատ լավ պայքարում է աղերի կուտակման դեմ: Դրա համար անհրաժեշտ է 2 գդալ սիզախոտի արմատը լցնել 1 բաժակ սառը ջրի մեջ ու եռացնել 10 րոպե ջրային գոլորշու վրա, թրմել 1 ժամ, որից հետո քամել եւ խմել օրը 3-4 անգամ` 1-2 գդալ: Թարմ տերեւների հյութը շատ լավ է մրսածության ու վերին շնչուղիների հիվանդությունների դեպքում:
Բուլղարական բժշկության մեջ սիզախոտից պատրաստված պրեպարատները օգտագործվում են ռեւմատիզմի եւ ցիստիտի ժամանակ: Նման դեպքերում թուրմը կամ եփուկը խմում են կես բաժակից, օրը 3 անգամ: Իսկ գերմանական բժշկության մեջ սիզախոտը հանդիսանում է լավ արյուն մաքրող միջոց:
Առատ դաշտանային ցիկլը կարգավորելու համար կամ արգանդային արյունահոսությունների դեպքում օգտագործում են սիզախոտի հյութ` կես բաժակից, օրը 3 անգամ: Այն օգնում է նաեւ լեղաքարային հիվանդությունների դեպքում: Հաստ աղիի հիվանդության ժամանակ խորհուրդ է տրվում կատարել միկրոհոգնաներ սիզախոտի թուրմով ամեն օր 50մլ-ից` 10-15 օր տեւողությամբ: Իսկ Ավիցենան իր բուժական գիտության մասին կանոններում գրում է, որ սիզախոտը շատ լավ օգնում է թարմ վերքերի ժամանակ, եթե այն պարզապես դնենք վերքի վրա: Հատկապես օգտակար է արմատը: Աչքի համար շատ լավ դեղամիջոց է սիզախոտի հյութը՝ մեղրով կամ գինով եփած: Նրա սերմերն ու արմատները շատ լավ միջոց են սրտխառնոցի դեմ:
Սիզախոտն օգտագործվում նաեւ խոհանոցում: Դրանով կարելի է պատրաստել շատ համեղ աղցան: 60գ սիզախոտը, 3 ճաշի գդալ մայոնեզը, 1 ճաշի գդալ քերած նեխուրը, 1 թեյի գդալ մեղրը եւ 2 ճաշի գդալ ջուրը խառնել, ստացվում է շատ համեղ աղցան:
Շատ համեղ ուտեստ է սիզախոտի տապակած արմատները:
Խորհուրդներ հիպերտոնիկներին
Հիպերտոնիկները պետք է ամառային տաք օրերին անհամբերությամբ սպասեն, քանի որ հենց շոգ եղանակն է ապահովում անոթների «կուրորտային վիճակ»: Մասնագետները համարում են, որ տաք ջերմաստիճանի դեպքում արյան անոթները թուլանում են ու լայնանում, որի արդյունքում զարկերակային ճնշումն իջեցնելու համար հատուկ ջանքեր չեն պահանջվում: Այնպես որ, շոգ եղանակին հիպերտոնիկները կարող են ապրել նույն այն ռեժիմով, որով եւ ոչ հիվանդ մարդիկ: Այսինքն՝ 2 լիտր հեղուկի քանակի օգտագործումը պետք է պահպանվի: Ամենաօգտակար հեղուկը այս պարագայում հանքային ջուրն է, իհարկե, ոչ գազով:
Շոգ եղանակին երեկոյան տուն հասնելով` մի շտապեք սառը ջրով լոգանք ընդունել, ընդհակառակը` ընդունեք տաք ցնցուղ: Քանի որ այս դեպքում անոթները լայնանում են, եւ հիվանդ մարդու ինքնազգացողությունը ավելի է լավանում:
Երբեք չի կարելի տանից դուրս գալուց առաջ թրջվել սառը ջրով` մտածելով, որ դա ձեզ կհովացնի: Սառը վերնաշապիկի զգացողությունը խաբուսիկ է, իսկ ահա բրոնխիտ վաստակելու հավանականությունն ավելի մեծ է: Պետք չէ սառնարանում հեղուկ պահել, հետո էլ չդիմանալ գայթակղությանը: Խորհուրդ չի տրվում հիպերտոնիկներին շոգ օրերին, ցերեկվա ժամերին գտնվել արեւի տակ կամ ֆիզիկական աշխատանք կատարել: Շոգ օրերին բոլորը, բայց հատկապես հիպերտոնիկները պետք է աշխատեն ընդունել շատ թեթեւ սնունդ եւ զերծ մնալ մսեղենից ու կենդանական յուղերից ու ճարպերից: Սնունդը պետք է լինի առաջին թարմության, այսինքն, պետք չէ 2 օրվա ճաշ պատրաստել ու պահել սառնարանում: