Ամերիկյան ռազմավարական հետազոտությունների եւ կանխատեսումների STRATFOR
կենտրոնը, հիմնվելով Ադրբեջանի կառավարությունում իր ունեցած աղբյուրների
վրա՝ տեղեկացնում է, որ ԱՄՆ-ի եւ Ադրբեջանի կառավարությունները
պայմանավորվել են Ադրբեջանում ամերիկյան ռազմական բազաներ տեղակայելու
հարցի շուրջ: Ըստ STRATFOR-ի, Վաշինգթոնը եւ Բաքուն այս հարցի շուրջ
վերջնական համաձայնության են եկել ապրիլի 12-ին ԱՄՆ պաշտպանության նախարար
Դոնալդ Ռամսֆելդի Բաքու կատարած այցի ընթացքում: Պայմանավորվածության
համաձայն՝ ամերիկյան ռազմական ուժերը կտեղաբաշխվեն Կուրդամիրում,
Նասոսնայայում եւ Գույուլլահում: Բոլոր 3 ռազմաբազաներում էլ կտեղակայվեն
տարբեր տիպի ինքնաթիռներ, եւ դրա համար արդեն արդիականացվել են
համապատասխան թռիչքուղիները: Իսկ Ադրբեջանում լույս տեսնող «Էխո» թերթն էլ
հավելում է, որ այս ուժերն Ադրբեջան կբերվեն այս տարվա ընթացքում եւ
այնտեղ կմնան երկար ժամանակ: Ավելին` թերթը, հիմնվելով իր աղբյուրների
վրա, գրում է, որ ամերիկյան առաջին զորամասերն Ադրբեջան կժամանեն արդեն
առաջիկա մի քանի շաբաթվա ընթացքում:
