Երեւանի Կոմիտաս-Գրիբոյեդով փողոցների խաչմերուկում երեկ` ժամը 01:00-ին, իրար են բախվել «ՎԱԶ-2107» մակնիշի 04 ՏԼ 597 պետհամարանիշով եւ «Սամատ» մակնիշի 016 ՕՍ 02 պետհամարանիշով ավտոմեքենաներ: ՀՀ Արտակարգ իրավիճակների նախարարության Հայաստանի Փրկարար ծառայության տեղեկատվության եւ հասարակայնության հետ կապերի բաժնի փոխանցմամբ` վթարի հետեւանքով զոհվել է մեկ քաղաքացի, իսկ տարբեր աստիճանի մարմնական վնասվածքներ ստացած մեկ ուղեւոր տեղափոխվել է «Արմենիա» բժշկական կենտրոն: Իսկ նախօրեին Ապարան-Աշտարակ ավտոճանապարհի վրա բախվել են «ՎԱԶ-2109» մակնիշի 64 ՏՏ 508 պետհամարանիշով ավտոմեքենան եւ «Ֆորդ-Տրանզիտ» մակնիշի 2333Լ միկրոավտոբուսը: Պատահարի հետեւանքով «ՎԱԶ-2109» մակնիշի ավտոմեքենայի ուղեւոր, 1961թ. ծնված Սոնա Այվազյանը ստացել է տարբեր աստիճանի մարմնական վնասվածքներ եւ տեղափոխվել Ապարանի հիվանդանոց:
