Երեկ Համաժողովրդական շարժման կենտրոնը տարածել է հայտարարություն` տեղեկացնելով, որ պատրաստվում է վիճարկել Երեւանի քաղաքապետարանի` նախօրեին կայացրած որոշումը Հայաստանի առաջին նախագահ, անցած ընտրություններում նախագահի թեկնածու Լեւոն Տեր-Պետրոսյանի գլխավորած Համաժողովրդական շարժման` հունիսի 20-ին Ազատության հրապարակում հանրահավաք եւ դրանից հետո քաղաքի կենտրոնական փողոցներով երթ անցկացնելու իրազեկումը մերժելու մասին: «Մենք, այնուամենայնիվ, ցանկանում ենք եւս մեկ շանս շնորհել իշխանություններին՝ հարցը քաղաքակիրթ եւ օրինական ճանապարհով լուծելու համար։ Ուստի մենք կվիճարկենք դատարանում սույն ապօրինի որոշումը, ինչպես նաեւ՝ նոր հայտով կդիմենք քաղաքապետարան՝ հանրահավաքի եւ երթի անցկացման համար։ Կառուցողականություն եւ ճկունություն դրսեւորելով՝ մենք հանրահավաքի անցկացման համար, բացի Ազատության հրապարակից, կառաջարկենք այլընտրանքային վայր՝ Մատենադարանին կից տարածքը»,- ասված է Համաժողովրդական շարժման կենտրոնի` նախօրեի ուշ երեկոյան տարածած հաղորդագրությունում։ Հիշեցնենք, որ քաղաքապետարանի մերժման համար հիմք է հանդիսացել Երեւանի քաղաքապետի հունիսի 5-ի կարգադրությունը, որով Ազատության հրապարակում հունիսի 9-ից սկսած արտոնվել է «Փոքրիկ երեւանցի» խորագրով միջոցառումների շարքի անցկացումը: Դրա շրջանակներում նախատեսված միջոցառումը հունիսի 20-ին սկսվելու է առավոտյան 11-ից եւ տեւելու է մինչեւ երեկոյան ժամը 9-ը: Ինչ վերաբերում է երթին, ապա այն արգելվել է պատճառաբանությամբ, թե «երթուղին խոշոր տրանսպորտային հանգույց է», «քաղաքի կենտրոնում կատարվում են լայնամասշտաբ շինարարական աշխատանքներ», ուստի նախատեսված երթը, ըստ Ոստիկանության գրության` «կկազմալուծի տրանսպորտի բնականոն ընթացքը, իրական վտանգ կսպառնա միջոցառման մասնակիցների կյանքին եւ առողջությանը», «կխախտվի հասարակական կարգն ու կսահմանափակվեն այլոց սահմանադրական իրավունքները»: Քաղաքապետարանը կազմակերպիչներին առաջարկել է նույն օրը, նույն ժամին հանրահավաքն անցկացնել «Հրազդան» մարզադաշտի հարեւանությամբ գտնվող հրապարակում, ինչը Համաժողովրդական շարժման անդամ Լեւոն Զուրաբյանը գնահատել է՝ որպես «ծաղր»: «Նույն հաջողությամբ մեզ կարող էին առաջարկել նաեւ Սովետաշենի աղբանոցը կամ նման մի ուրիշ տեղ: Դա ակնհայտ նվաստացման փորձ է նրանց կողմից, ծաղրանք… Բնականաբար` անընդունելի մեզ համար»,- «Ազատություն» ռադիոկայանին ասել է Լ.Զուրաբյանը: «Շարժումն արդեն հայտարարել էր, որ, անկախ ռեժիմի կողմից ընդունված որոշումներից, հունիսի 20-ի հանրահավաքը կայանալու է։ Մենք վերահաստատում ենք այդ օրը ազատ հավաքների սահմանադրական հիմնարար իրավունքի վերականգնման մեր վճռականությունը»,- հաղորդագրությամբ հայտարարել է Համաժողովրդական շարժման կենտրոնը:
