ՀՀ նախագահ Սերժ Սարգսjանը մայիսի 26-ին հրամանագիր է ստորագրել Հանրապետության տոնի կապակցությամբ ՀՀ պատվավոր կոչումներ շնորհելու մասին: Եվ այսպես. Ժողովրդական արտիստի պատվավոր կոչման է արժանացել ռեժիսոր, մուլտիպլիկատոր Ռոբերտ Սահակյանցը, Ժողովրդական նկարչի պատվավոր կոչման` գեղանկարիչ Ռոբերտ Էլիբեկյանը: Վաստակավոր արտիստի պատվավոր կոչման են արժանացել դաշնակահարուհի Մարինե Աբրահամյանը, դաշնակահար Արմեն Բաբախանյանը, ՀՀ ժողովրդական նվագարանների նվագախմբի գեղարվեստական ղեկավար եւ գլխավոր դիրիժոր Նորայր Դավթյանը, «Սայաթ-Նովա» աշուղական երգի անսամբլի գործիքային մասի ղեկավար Արտյոմ Խաչատրյանը: Նույն կոչման են արժանացել նաեւ ՀՀ Պարի պետական անսամբլի գլխավոր պարուսույց Ասատուր Կարապետյանը, Կոմիտասի անվան պետական քառյակի ալտահար Ալեքսանդր Կոսեմյանը եւ երգչուհի Աննա Մայիլյանը:
Ս. Սարգսյանի հրամանագրով վաստակավոր նկարչի պատվավոր կոչման է արժանացել գեղանկարիչ Հրանտ Թադեւոսյանը: Վաստակավոր մանկավարժի պատվավոր կոչումը տրվել է Երեւանի Մ. Գորգիսյանի անվան թիվ 158 միջնակարգ դպրոցի զինղեկ, գնդապետ Դանիել Թադեւոսյանին:
Արվեստի վաստակավոր գործչի պատվավոր կոչման են արժանացել գեղանկարիչ, ՀՀ Նկարիչների միության նախագահ Կարեն Աղամյանը, ՀՀ ԳԱԱ Արվեստի ինստիտուտի տնօրեն, արվեստագիտության դոկտոր, պրոֆեսոր Արարատ Աղասյանը, «Չիկոն եւ ընկերները» ջազային խմբի գեղարվեստական ղեկավար Արմեն Թութունջյանը եւ երաժշտագետ, արվեստագիտության թեկնածու, պրոֆեսոր Արաքսի Սարյանը: Մշակույթի վաստակավոր գործչի պատվավոր կոչման են արժանացել ՀՀ Գրողների միության նախագահ Լեւոն Անանյանը, «Բերդ» պարային անսամբլի գլխավոր պարուսույց, մանկավարժական գիտությունների թեկնածու, դոցենտ Կարեն Գեւորգյանը, ՀՀ ՊՆ Սպայի տան «Սարդարապատ» պարի անսամբլի գեղարվեստական ղեկավար Մուրադ Հակոբյանը, դաշնակահար, «Մեկ ազգ, մեկ մշակույթ» հիմնադրամի գեղարվեստական ղեկավար Արմեն Մանուկյանը եւ «Տարոն» մանկապատանեկան գուսանական երգչախմբի գեղարվեստական ղեկավար Գեւորգ Չաքմանյանը։ Իսկ վաստակավոր լրագրողի պատվավոր կոչման է արժանացել մեր գործընկեր, ԻՏԱՌ-ՏԱՍՍ տեղեկատվական գործակալության թղթակից Տիգրան Լիլոյանը: Ի դեպ, Սերժ Սարգսյանի հրամանագրով երեկ մի խումբ գործիչներ պարգեւատրվել են նաեւ ՀՀ շքանշանով եւ մեդալներով: