Երեւանի մոր եւ մանկան առողջության պահպանման գիտահետազոտական ինստիտուտի տնօրեն Գեորգի Օկոեւն «Արմենպրեսի» թղթակցի հետ զրույցում ասել է, որ Հայաստանում, այսպես կոչված, «փոխարինող մայրերի» միջոցով երեխա ունենալու եղանակը բավականին պահանջարկ ունի: Դա այն է, երբ կինն անհաջող ծննդաբերությունների հետեւանքով կամ ի ծնե չունի արգանդ, սակայն ունի ձվարան, եւ բժշկական համապատասխան միջամտության շնորհիվ հնարավոր է, որ հիվանդ կնոջ երեխային իր արգանդում կրի եւ զարգացնի մեկ այլ կին: Այդպիսով, երեխան կրում է իր կենսաբանական ծնողների գեները, սակայն զարգանում է այլ կնոջ արգանդում: Գ. Օկոեւի խոսքերով` այս մեթոդը մեզանում բավականին անհրաժեշտ է, քանի որ նման առողջական խնդիրներ հայ կանանց մոտ բավականին հաճախ են գրանցվում: Ներկայումս նման միջամտության դիմելու շուրջ 60 դիմում է ստացվել, սակայն այս դեպքում առկա է «փոխարինող մայրերի» սակավության խնդիրը, ինչի մասին համապատասխան հայտարարություններ են տարածվում:
