Անցած գիշեր Սյունիքում տեղացած առաջին ձյան պատճառով դժվարանցանելի են դարձել թե՛ Երեւան-Մեղրի միջպետական ճանապարհի Սյունիքով անցնող հատվածը, թե՛ մարզային ու համայնքային նշանակության ճանապարհները: Մարզային փրկարարական վարչությունից «Արմենպրեսին» հայտնել են, որ հատկապես դժվարանցանելի են միջպետական ճանապարհի Գորիս-Սիսիան եւ Մեղրիի լեռնանցքի հատվածները: Ավտոմեքենաների երթեւեկությունը դժվարացնում են հատկապես առատ տեղումները եւ մառախուղը: Փակվել է Կապան-Մեղրի նորակառույց այլընտրանքային ճանապարհի Շիշկերտ գյուղի տարածքով անցնող հատվածը: Փակ են համայնքային նշանակության մի քանի ճանապարհներ եւս: Մարզի ճանապարհաշինարարական ընկերությունները ձեռնարկում են միջոցներ՝ ճանապարհի երթեւեկությունը վերականգնելու համար: Առատ տեղումները Սյունիքի մարզում շարունակվում են:
