ՀՀ վարչապետ Սերժ Սարգսյանը հոկտեմբերի 17-ին մեկնել է ԱՄՆ: Պատվիրակության կազմում են ՀՀ ֆինանսների եւ էկոնոմիկայի, առեւտրի եւ տնտեսական զարգացման, գյուղատնտեսության նախարարները, ՀՀ նախագահի տնտեսական հարցերով գլխավոր խորհրդականը, ՀՀ Կենտրոնական բանկի նախագահը, ԱԳ նախարարի տեղակալը: Այցի շրջանակներում ՀՀ կառավարական պատվիրակությունը կմասնակցի Համաշխարհային բանկի եւ Արժույթի միջազգային հիմնադրամի տարեկան համաժողովին ու Հայ-ամերիկյան տնտեսական համագործակցության միջկառավարական հանձնաժողովի նիստին: Ս. Սարգսյանը հոկտեմբերի 18-ին կայցելի Պենտագոն եւ հանդիպում կունենա ԱՄՆ պաշտպանության քարտուղար Ռոբերտ Գեյթսի հետ: Նույն օրը Սպիտակ տանը կկայանա ՀՀ վարչապետ Սերժ Սարգսյանի հանդիպումը ԱՄՆ փոխնախագահ Ռիչարդ Չեյնիի հետ: «Հազարամյակի մարտահրավեր» կորպորացիայի կենտրոնակայանում տեղի կունենա Սերժ Սարգսյանի հանդիպումը կորպորացիայի ղեկավար Ջոն Դանիլովիչի հետ: Պատվիրակությունը հոկտեմբերի 18-ի երեկոյան Վաշինգտոնից կմեկնի Լոս Անջելես, որտեղ հոկտեմբերի 19-ին նախատեսվում է ՀՀ վարչապետի հանդիպումը «Լոս Անջելես թայմսի» խմբագրային խորհրդի հետ: Նույն օրը կկայանա վարչապետի հանդիպումը Լինսի հիմնադրամի ղեկավարների հետ: Հոկտեմբերի 20-ին պատվիրակությունը կմեկնի Վաշինգտոն, որտեղ հոկտեմբերի 21-ին Ս. Սարգսյանը հանդիպում կունենա ԱՄՀ կառավարիչ-տնօրեն Դոմինիկ Ստրաուս-Քանի հետ: Հոկտեմբերի 22-ին ԱՄՆ մայրաքաղաքում կմասնակցեն Համաշխարհային բանկի եւ Արժույթի միջազգային հիմնադրամի տարեկան համաժողովին: Այնուհետեւ վարչապետ Սերժ Սարգսյանը կմեկնի ԱՄՆ Սենատ` հանդիպելու Սենատի մեծամասնության առաջնորդ Հարրի Ռիդի հետ: Հոկտեմբերի 23-ին ԱՄՆ Պետդեպարտամենտում Սերժ Սարգսյանն առանձնազրույց կունենա ԱՄՆ պետքարտուղարի տեղակալ Ռուբեն Ջեֆերիի հետ: Հոկտեմբերի 23-ին նախատեսվում է նաեւ ԱՄՆ Պետդեպարտամենտում ՀՀ վարչապետի հանդիպումը ԱՄՆ պետքարտուղար Կոնդոլիզա Ռայսի հետ: Վարչապետը Վաշինգտոնում նաեւ կհանդիպի ամերիկահայ կազմակերպությունների ղեկավարության հետ: Իսկ հոկտեմբերի 23-ին Ս. Սարգսյանի ղեկավարած պատվիրակությունը կմեկնի Փարիզ: ՀՀ վարչապետի հոկտեմբերի 17-27-ը (ներառյալ) գործուղման մեջ գտնվելու ժամանակահատվածում նրան կփոխարինի փոխվարչապետ, ՀՀ տարածքային կառավարման նախարար Հովիկ Աբրահամյանը:
